١٨ ئابی ٢٠٢٥
ئەولەویەت بۆ هەر حکومەتیک لەپێشەوە دابینکردنی مووچەی کارمەندانیەتی بۆ بەریوەبردنی دامودەزگاکانی حوکمەت کە ئەوەی کرد، ئینجا ئەگەر بودجەی زیادە بەردەست بوو تەرخانی دەکات بۆ پڕۆژەکان و جادەوبانەکان، تەنها حکومەتی کاربەڕێکەری هەرێم نەبێت کە ئەوەی بیری نییە مووچەیە.
دەبینین ڕۆژانە بەتایبەتی لە سنووری هەولێر و دهۆک، پرۆژەی جیاواز لە بوارەکانی ڕیگاوبان یان گەشتیاری و هتد دەکرێتەوە و وێنەی دەگیرێت و بڵاودەکرێتەوە کە هەمووی لەسەر حسابی مووچەی فەرمانبەرانە، تەنها چونکە خۆیان قازانجی لێدەکەن و بۆ ئەوەش خۆی پێوە بابدەن و بڵێن، کوردستان لە ناوچەکانی تری عیراق پیشکەوتووترە.
ئەو خۆبادانە کاتێک جوانە و لێیان دێت، ئەگەر لە پێشەوە مووچەی فەمانبەرانیان دابینکردبێت و تێریان کردبن.
جگە لە سەرف کردنی بڕێکی زۆری بوودجە بۆ خۆشگوزەرانی خۆیان و دەست و پێوەندەکانیان کە ئەوەش هەموو وەک وتم لەسەر حیسابی مووچەی فەرمانبەرانە؛ خۆی لە بنەڕەتدا دەبێت حکومەت لە پێشەوە مووچەی فەمانبەران و کارمەندان دابین بکات لەو بودجەیەیەی لەبەردەستیەتی، ئینجا ئەوەی زیاد بوو تەرخانی بکات بۆ پرۆژە. بەڵام ئەمان بە پێچەوانەوە فەرمانبەران و کارمەندانیان برسی کردووە و مووچەکانیان نادەن و پرۆژەکانی پێ ئەنجام دەدەن.
لەتیف شێخ مستەفا