پۆلیسی سلێمانی رایگەیاند، بەتۆمەتی دزیکردن، لەلایەن مەفرەزەکانی نوسینگەی نەهێشتنی تاوانی سەیدسادقەوە سێ تۆمەتبار دەستگیرکران.

بەڕێوەبەرایەتی پۆلیسی سلێمانی، لە بڵاوکراوەیەکدا رایگەیاند، دوای ئەوەی هاوڵاتییەک سکاڵای تۆمارکرد، کە لە ماڵەکەی دزی لێکراوە و پارەی لێبراوە، هێزەکانی پۆلیس لێکۆڵینەوە و بەدواداچوونیان دەستپێکردوو دوای لێکۆڵینەوەکان توانرا لەلایەن مەفرەزەکانی نوسینگەی نەهێشتنی تاوانی سەیدسادقەوە تۆمەتباران بدۆزرێنەوە و دەستگیربکرێن.

ئاشکراشیکرد، تۆمەتبارەکان بڕی 50 ملیۆن دیناری عێراقی و 22 هەزار و 500 دۆلاری ئەمریکییان لە ماڵی سکاڵاکار دزیوە و لە کاتی دەستگیرکردنیان دەستیش گیرا بەسەر دوو چەک، لە جۆری دەمانچە و دوو ئۆتۆمبێل و بڕێک لە پارە دزراوەکەدا.

ئاماژەی بەوەشکرد، تۆمەتباران (ش، س، ع - ر، م، أ - م، ج، ن) بە بڕیاری دادوەر راگیراون و لێکۆڵینەوە لە رووداوەکە بەردەوامە.